ಚೀನಾದಿಂದ ಕಂಪನಿಗಳು ಕಾಲ್ಕಿತ್ತುತ್ತಿವೆ :ಅವಕಾಶಗಳನ್ನು ನೀಡಲು ಸಿದ್ಧರಾಗಿ ಎಂದು ಸಿಎಂಗಳಿಗೆ ಸೂಚನೆ ನೀಡಿದ ಪ್ರಧಾನಿ ಮೋದಿ

ಚೀನಾದಿಂದ ಆರಂಭಗೊಂಡ ಕೊರೊನ ವೈರಸ್ ನಿಂದಾಗಿ   ವುಹಾನ್‌ನಿಂದ ಕಂಪನಿಗಳು ಕಾಲ್ಕಿತ್ತುತ್ತಿವೆ ಅವುಗಳಿಗೆ ಅಗತ್ಯ ಸೌಕರ್ಯ ನೀಡಲು ಸಿದ್ಧವಾಗಿರಿ. ಅಲ್ಲಿನ ಕಂಪನಿಗಳನ್ನು ಆಕರ್ಷಿಸಲು ನಿಮ್ಮ ರಾಜ್ಯಗಳಲ್ಲಿ ಅವಕಾಶಗಳನ್ನು ಸೃಷ್ಟಿಸಿ ಎಂದು ಎಲ್ಲ ರಾಜ್ಯಗಳ ಮುಖ್ಯಮಂತ್ರಿಗಳಿಗೆ ಪ್ರಧಾನಿ ನರೇಂದ್ರ ಮೋದಿ ಸಲಹೆ ನೀಡಿದ್ದಾರೆ.ಸೋಮವಾರ ಲಾಕ್‌ಡೌನ್‌ ಬಗ್ಗೆ ಚರ್ಚಿಸಲು ನಡೆದ ಮುಖ್ಯಮಂತ್ರಿಗಳ ಸಭೆಯಲ್ಲಿ ಪ್ರಧಾನಿ ಈ ವಿಷಯವನ್ನು ಪ್ರಸ್ತಾಪಿಸಿದ್ದಾರೆ. ಕೊರೊನಾ ವೈರಸ್‌ ಕಾರಣದಿಂದ ಹಲವು ಕಂಪನಿಗಳು ವುಹಾನ್‌ ಪ್ರಾಂತ್ಯವನ್ನು ತೊರೆಯುತ್ತಿವೆ. ಅವರಿಗೆ ಭಾರತದಲ್ಲಿ ಅವಕಾಶಗಳನ್ನು ನೀಡಲು ಎಲ್ಲ ಸಿದ್ಧತೆಗಳನ್ನು ಮಾಡಿಕೊಳ್ಳಿ ಎಂದು ಮೋದಿ ಹೇಳಿದ್ದಾರೆ.

ಆಧುನಿಕ ಮೂಲಸೌಕರ್ಯ ಹಾಗೂ ಕೌಶಲಯುತ ಮಾನವ ಸಂಪನ್ಮೂಲಗಳನ್ನು ನೀಡಿ ಕಂಪನಿಗಳ ಹೂಡಿಕೆಯನ್ನು ನಿಮ್ಮ ನಿಮ್ಮ ರಾಜ್ಯಗಳಿಗೆ ಆಕರ್ಷಿಸಿ. ಚೀನಾಗೆ ಬದಲಾಗಿ ಭಾರತ ಅಲ್ಲಿನ ಕಂಪನಿಗಳಿಗೆ ಉತ್ತಮ ಸ್ಥಳವಾಗಿ ಮಾರ್ಪಡಲಿ ಎಂದು ಮೋದಿ ಸೂಚಿಸಿದ್ದಾರೆ.

ಕೊರೊನಾ ವೈರಸ್‌ ಬಿಕ್ಕಟ್ಟಿನ ನಂತರ ಅನೇಕ ಕೈಗಾರಿಕೆಗಳು ಚೀನಾದ ಹೊರತಾದ ಆಯ್ಕೆಗಳನ್ನು ಹುಡುಕುತ್ತಿವೆ. ಆದ್ದರಿಂದ ಭಾರತದ ರಾಜ್ಯಗಳಲ್ಲಿ ಅಂತಹ ಕಂಪನಿಗಳು ಬಂದು ಹೂಡಿಕೆ ಮಾಡುವಂತೆ ಮಾಡಲು ಸಮಗ್ರ ಯೋಜನೆಯನ್ನು ರೂಪಿಸಲು ಎಲ್ಲರೂ ಜೊತೆಯಾಗಿ ಕೆಲಸ ಮಾಡಬೇಕು ಎಂದು ಮುಖ್ಯಮಂತ್ರಿಗಳಿಗೆ ಮೋದಿ ಹೇಳಿದ್ದಾರೆ ಎಂದು ಮೂಲಗಳು ತಿಳಿಸಿವೆ.