ಫ್ರಾನ್ಸ್ ನಲ್ಲಿ ಸರಣಿ ಇಸ್ಲಾಮಿಕ್ ಭಯೋತ್ಪಾದಕ ದಾಳಿಗಳಿಂದ ಕಂಗೆಟ್ಟಿರುವ ಫ್ರೆಂಚ್ ಸರ್ಕಾರ ತನ್ನ ದೇಶದ ಜನರ ನೋವು ವ್ಯರ್ಥವಾಗಲು ಬಿಡೋದಿಲ್ಲ ಎಂದು ಸಾರಿತ್ತು. ಇದೀಗ ಫ್ರೆಂಚ್ ತಾನು ಶಪಥಗೈದಂತೆ ನಡೆದುಕೊಂಡಿದ್ದು, ಐವತ್ತಕ್ಕೂ ಹೆಚ್ಚು ಉಗ್ರರನ್ನು ಕೊಂದು ಹಾಕಿದೆ.
ಪಶ್ಚಿಮ ಆಫ್ರಿಕಾದ ಮಾಲಿ ಪ್ರದೇಶದಲ್ಲಿ ಫ್ರೆಂಚ್ ಸರ್ಕಾರ ವೈಮಾನಿಕ ದಾಳಿ ನಡೆಸಿದ್ದು, ದಾಳಿಯಲ್ಲಿ ಅಲ್ಖೈದಾ ಉಗ್ರ ಸಂಘಟನೆಯ ಜೊತೆ ನಂಟು ಹೊಂದಿದ್ದು ಐವತ್ತಕ್ಕೂ ಹೆಚ್ಚು ಉಗ್ರರನ್ನು ಸದೆ ಬಡಿದಿರುವುದಾಗಿ ಘೋಷಣೆ ಮಾಡಿದೆ. ಈ ಕುರಿತು ಫ್ರೆಂಚ್ ಸರ್ಕಾರ ನಿನ್ನೆ ಅಧಿಕೃತ ಹೇಳಿಕೆಯನ್ನು ಬಿಡುಗಡೆ ಮಾಡಿದೆ.
ಈ ಕುರಿತು ಮಾತನಾಡಿರುವ ಫ್ರೆಂಚ್ ಸರ್ಕಾರದ ರಕ್ಷಣಾ ಸಚಿವೆ ಫ್ಲಾರೆನ್ಸ್ ಪಾರ್ಲಿ, ಕಳೆದ ಶುಕ್ರವಾರ ಅಂದರೆ ಅಕ್ಟೋಬರ್ 30ರಂದು ಬುರ್ಕಿನಾ ಫಾಸೊ ಮತ್ತು ನೈಜರ್ ಗಡಿ ಸಮೀಪ ವೈಮಾನಿಕ ದಾಳಿ ನಡೆಸಲಾಗಿದೆ. ಆಪರೇಷನ್ ಬರ್ಖೇನ್ ಪಡೆ ಐವತ್ತಕ್ಕೂ ಹೆಚ್ಚು ಜಿಹಾದಿಗಳನ್ನು ಕೊಂದು ಹಾಕಿದ್ದಾರೆ. ಶಸ್ತ್ರಾಸ್ತ್ರಗಳು, ಸ್ಫೋಟಕ ವಸ್ತುಗಳುಮತ್ತು 30 ಮೋಟಾರ್ ಸೈಕಲ್ಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ತಿಳಿಸಿದ್ದಾರೆ.
ಬಮಾಕೊಗೆ ತೆರಳುವ ಮುನ್ನ ಮಾತನಾಡಿರುವ ಫ್ಲಾರೆನ್ಸ್, ಗಡಿ ಪ್ರದೇಶಗಳಲ್ಲಿ ದೊಡ್ಡದಾದ ಮೋಟಾರ್ ಸೈಕಲ್ಗಳ ಕ್ಯಾರವಾನ್ ಇದ್ದಿದ್ದನ್ನು ಡ್ರೋಣ್ ಕ್ಯಾಮೆರಾ ಮೂಲಕ ನಮ್ಮ ಭದ್ರತಾ ಪಡೆ ಪತ್ತೆ ಹಚ್ಚಿತ್ತು. ನಂತರ ಕಾರ್ಯಾಚರಣೆ ಆರಂಭಿಸಿದಾಗ ಉಗ್ರರು ಮರಗಳ ಅಡಿ ಅಡಗಿಕೊಂಡಿದ್ದರು. ಈ ವೇಳೆ ಎರಡು ಮಿರಾಜ್ ಜೆಟ್ಗಳು ಮತ್ತು ಡ್ರೋಣ್ಗಳನ್ನು ಕಳಿಸಿ ಉಡಾಯಿಸಿದಾಗ ಉಗ್ರರು ಹತರಾಗಿದ್ದಾರೆ ಎಂದು ತಿಳಿಸಿದ್ದಾರೆ.
ಉಗ್ರರು ಅಡಗಿರುವ ಈ ಪ್ರದೇಶಕ್ಕೆ ದಾಳಿ ನಡೆಸಲು ರಕ್ಷಣಾ ಪಡೆ ಯೋಜನೆ ರೂಪಿಸಿತ್ತು. ಘಟನಾ ಸ್ಥಳದಲ್ಲಿ ಆತ್ಮಾಹುತಿ ಜಾಕೆಟ್ ಮತ್ತು ಸ್ಫೋಟಕಗಳು ಪತ್ತೆಯಾಗಿದ್ದು,ನಾಲ್ವರು ಉಗ್ರರನ್ನು ಜೀವಂತವಾಗಿ ಸೆರೆಹಿಡಿಯಲಾಗಿದೆ ಎಂದು ಮಿಲಿಟರಿ ವಕ್ತಾರ ಕರ್ನಲ್ ಫ್ರೆಡರಿಕ್ ತಿಳಿಸಿದ್ದಾರೆ.
Comments
Post a Comment